Diwar-benn an devezh-studi

1. Pegoulz e vo un dra bennak er rubrikenn-mañ ?

   A-benn nebeut e vo pourvezet.
   
   

2. Abaoe pegoulz e vez aozet ar staj stummañ gant KEAV ?

   Er penn kentañ e raemp daou zevezh-stummañ, ar sadornvezh hag ar sulvezh. Er bloavezh 1985 e oa bet graet evit ar wech kentañ ha goude e veze graet bep bloaz nemet e-pad ma veze labouret da sevel Geriadur hollvrezhoneg kentañ An Here : kalz eus hon c’henlabourerien a oa dalc’het gant al labour-se ; ar bloavezhioù 1989-1994 ne oa bet graet eta staj stummañ ebet ganeomp. A-hend-all ez eus bet graet ingal bep bloaz, nemet ur bloavezh, e 2008, m’hon oa ranket nulañ ar staj. Hag a-ziwar neuze ne voe aozet nemet stajoù un devezh.
   
   

3. Perak e vez aozet un devezh-studi gant KEAV ?

   Er bloavezhioù 1980, e oa tud e KEAV hag a rae enklaskoù war tachenn pe dachenn. Soñjet oa bet ganeomp e vije mat d’ar re-se displegañ ar ouiziegezh o doa bet evel-se d’an izili all e KEAV… Hag a-hend-all, kelennerien zo e KEAV a rae gant doareoù, teknikoù kelenn nevez. Mat e vije bet dezhe ivez displegañ d’ar re all penaos e raent… Evel-se oa bet savet ar stajoù kentañ. Un den a oa tro-ha-tro, prezegenner pe stummer ha stajiad…Abalamour da se e raemp « staj emstummañ » diouzh ar stajoù-se…
   Adal ar bloavezh kentañ, er staj e veze hiniennoù na oant ket da vat izili e KEAV... Ha tamm-ha-tamm e oa muioc’h-mui a dud… Met oc’h ober se e komprenjomp daou dra : da gentañ, pep tra a oa da c’houzout war ar brezhoneg na oa ket bet displeget el levrioù deskiñ nag er « yezhadurioù elfennel* », pep tra ne oa ket bet laket splann e Yezhadur Bras Kervella zoken… Ha d’an eil, ezhomm ha c’hoant a oa d’anaout a-bep seurt pedagogiezh… Setu, a-ziwar ar soñj-se ez eus bet aozet devezhioù stummañ KEAV a vez graet devezh-studi dioutañ ivez bremañ… *elfennel = eeun (élémentaire)
   
   

4. Piv a c'hall kemer perzh en devezhioù-studi ?

   Kelennerion KEAV evel-just, ar re-se a vez profet dezhe an devezh stummadur. Met kelennerion eus a bep lec'h, hag an holl re a zo tomm ouzh ar brezhoneg, a c’hall heuliañ devezh-studi KEAV… An holl zivizoù a vez e brezhoneg, dav eo eta d’an dud a gemer perzh kaout ul live brezhoneg dereat memestra anez chom hep kompren kalz a dra.
   
   

5. Penaos e vez savet ar program ? Penaos e vez dibabet ar brezegennourien ?

   Peurliesañ e klaskomp lakat an hanter eus an amzer da studi ar brezhoneg hag an hanter all d’ar bedagogiezh… Met n’eo ket ur reolenn dir, a-wechoù e vez studiet ar brezhoneg e-pad an div hanterenn…
   Dibab danvez ha dibab ar brezegennourien a zo evel an daou du eus ar memes pezh… A-wechoù hon eus c’hoant da selaou displegadennoù war ur poent yezh resis abalamour d’ur goulenn bennak a vije bet graet ouzhomp e-pad ar staj-hañv pe abalamour ma’z eus unan ac’hanomp hag a vefe plijet ma vefe sklaeraet e anaoudegezh war ar poent-mañ poent. Evit an displegadennoù pedagogiezh, e tibabomp doareoù nevez, teknikoù nevez o devez brud vat. Ha diwar neuze e klaskomp ar brezegennourien a c’hallfe bastañ d’an ezhommoù-se… A-wechoù e c’hoarvez ar c’hontrel-fed : c’hoant hon eus da bediñ un den barrek pe gouiziek a anavezomp hag e klaskomp ar c’hrefen a c’hallfe plediñ gante.
   
   

6. Penaos e vez aozet an traoù ?

   Dre vras e vez degemeret an dud adalek 9 eur hanter gant ur banne kafe hag e krog ar c'hentañ displegadenn da 10 eur hag echuet e vez etre kreisteiz ha kreisteiz hanter : ar pred a vez da greisteiz hanter. Adkroget vez gant an eil prantad da ziv eur betek 4eur pe 4 eur hanter. Diouzh c’hoant ar brezegennerien pe ar stajidi e vez un troc’h e-kerz ar prezegennoù. Klasket e vez ober un tamm bilañs a-raok mont kuit, met se a zo diouzh an amzer : pa vez seblant skorn pe riell ez echuomp abretoc'h.
   
   

7. Pelec'h e vezomp degemeret ?

   Abaoe un toullad bloavezhioù e vezomp degemeret e Kreizenn an Amzer Nevez e Plañvour e Bro Wened (er Morbihan), ur barrez stok ouzh An Oriant. Ar rener a zo ur brezhoneger anezhañ hag ur stourmer. Un degemer mat a vez graet deomp. Ur pred a vez fardet deomp er greizenn da greisteiz, priz ar pred a zo e-barzh priz an devezh-studi.
   
   

8. Pelec’h emañ Plañvour ?

   E Bro-Wened emañ Plañvour, er Morbihan, stok ouzh An Oriant eo, er c’hornôg d’An Oriant emañ. E galleg e vez skrivet « Ploemeur » ha se a vez skrivet war ar c’hartennoù-hent gallek.
   
   

9. Daoust hag eñ vez servijet ur pred da greisteiz ?

   Ya, hag e vez ! Ur sal debriñ, ur gegin, hag ur c'heginer a zo er greizenn ; fardet e vo ar boued war al lec'h. Priz ar pred a zo e-barzh priz an devezh-studi.
   
   

10. Pegement e koust an devezh-studi ? Pegement e koust ar pred ?

    Priz an devezh a vez merket bep bloaz war ar folenn-brudañ a vez war baper hag a vez war al lec’hienn ivez. Priz ar pred a zo e-barzh priz an devezh-studi. Ar priz-se a dalvez evit ar pred, feurm ar sal hag ar frejoù pedagogel.